每當去到下午時段，大家就梗係會約埋朋友去嘆返個下午茶，齊齊放鬆一下。今次就去到位於觀塘嘅Moreish & Malt， 睇下佢地有啲咩啱夏日食嘅下午茶餐同新品啦！

Moreish & Malt喺設計餐廳名嘅時候就已經費盡心思。Moreish意指食客喺品嚐過餐點後會想再食，而Malt就係酒嘅原材料麥，延伸出飲品嘅意思。一餐是否完整就視乎有無飲料去平衡返餐點。

繽fun窩夫 $68 (包咖啡或茶)

呢款牛油窩夫鬆軟可口，中間夾有鮮雜苺同埋忌廉，並配有士多啤梨醬同埋朱古力醬。餐點嘅賣相亮麗，而且色彩斑斕，影相分享俾朋友嘅話一定可以令佢地羡慕至極。

雪「高」繽紛奶昔 $98

呢款餐點以新鮮果汁沙冰為底，喺杯面放上朱古力餅作底，再放上冬甩及三球雪糕，砌出集合多款甜食嘅高塔。雪糕有朱古力，士多啤梨同雲呢拿三種味道，而底下嘅奶昔就有荔枝同士多啤梨呢兩個口味揀，奶昔入面仲加咗雪糕同沙冰咖。咁邪惡嘅餐點就最啱同閨蜜一齊分享啦！

餐廳仲為呢款甜食舉行咗個挑戰。由呢個星期起至八月三十一號，只要你可以喺五分鐘內成功食完呢個巨型奶昔，就可以免咗奶昔嘅費用啦！

炸雪球波波 $78

呢款餐點有以明亮嘅色彩為主調，令人心情愉快。底下放咗佈滿雲石花紋棉花糖，而上面就係炸雪糕啦！炸雪糕嘅表面香脆，打開就會有半溶嘅雪糕流出嚟，好吸引呀！

完美嘅一餐又點少得野飲呢？嚟到夏天，餐廳就配合返季節氣氛，一共推出咗三款以花同水果為主題嘅特飲。

Berry Tonic (鮮果蜜桃野苺果茶) $68

生果茶加入自家製特濃桂花水，配上新鮮藍苺，漿果，香桃，令呢款飲品果味十足。另外，飲品亦加入咗桂花以及由佢地煮出嚟嘅糖，所以仲帶有陣陣甜美花香。

Thai Soda  (冰涼香茅檸檬梳打) $68

呢款飲品中加入咗解渴嘅香茅，加上蜜糖及梳打水製成。入面仲落咗薑水去帶出香茅味，配合埋微酸檸檬就令成個飲品更加清新，為呢個夏天帶嚟冰涼嘅感覺！

Lychee Rose (玫瑰洛神花荔枝茶)$68

整杯飲品呈現高雅嘅紫色，表面就灑上玫瑰花瓣，真係好靚呀。紫色係洛神花嘅天然顏色，所以茶中係無加入色素咖。荔枝茶飲用時除咗有荔枝果肉，仲會品嚐到玫瑰味。女士們一定會好鐘意呢杯充滿花香嘅飲品！

Moreish & Malt
地址: 觀塘鴻圖道48號地下B號舖 (35807133)
         紅磡蕪湖街83號逸‧酒店1樓 (22758778)