經過世界盃一役之後,冰島呢個國家為好多人所認識,相信唔少人都被呢個島國吸引,想揾機會去一探究竟。由於冰島擁有獨特嘅地理位置以及地質,島上有唔少令人嘆為觀止嘅震撼景色。
冰島上有兩個不容錯過嘅天然景像,分別係夏季特有嘅午夜太陽,以及冬季先有機會出現嘅極光。
午夜太陽就係指喺理應天黑嘅深夜時分,仍然可以見到太陽高掛喺天上情況。由於冰島位於北極圈,屬於高緯度地區,地球嘅轉軸角度會令夏季嘅太陽唔會由落下,形成極長嘅日照時間,亦就此形成太陽日夜都高掛嘅景像。
喺不落太陽嘅照耀下,海面呈現出別緻景色。由於冰島夏季氣候温和,令呢個時段成為賞鯨嘅好機會。當地有夏季特設嘅午夜太陽賞鯨船,幸運嘅話你將會欣賞到海上跳躍舞動嘅鯨魚,喺橘黃嘅太陽之下畫面別具詩意。
嚟到冬季就係極光出現嘅時候啦!當來自太陽嘅帶電粒子受磁場影響,集中到南北極,並與大氣中嘅原子、分子碰撞,因而產出能量及光芒,形成極光。呢個美麗嘅景像要喺漆黑嘅環境中先有機會被肉眼睇見,所以喺冰島嘅永晝夏季喺見唔到極光咖。
即使你喺冬季到訪冰島,亦唔代表一定可以睇到極光,一切都係要講個緣字。能否以肉眼捕捉極光講求客觀條件,包括天氣情況,極光指數,以及環境嘅黑暗程度,真係缺一不可咖!最適合觀賞極光嘅月份為9月至3月,如果想親眼見證呢個令人屏息嘅景像,就要好好把握呢段時間去碰碰運氣啦。
Tags: homita小出走
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like