地獄式嘅減肥法唔係人人都堅持到，到底有無方法可以令人輕輕鬆鬆就減到肥咖？其實係有咖！咁好嘅事就當然要同大家一齊分享啦，今次要介紹嘅就係喺日本大熱嘅貓式伸懶腰減肥法。唔好睇少伸懶腰呢個動作呀，其實佢可以幫大家減腰圍，練成小蠻腰指日可待！

咁點解伸懶腰有咁神奇嘅功效呢？

第一，喺你伸懶腰嘅時候，係可以輕鬆咁樣進行腹式呼吸以及胸式呼吸，呢兩種呼吸法可以刺激內臟嘅活動，仲可以提升呼吸嘅機能，從而達到促進新陳代謝嘅效果。係咁嘅話，排走毒素都會容易啲呀！

第二，其實伸懶腰仲可以刺激到背部嘅肌肉，特別係豎脊肌，肌肉長期受到鍛鍊可以達致強化效果。除咗肌肉之外，呢個動作仲可以刺激分泌荷爾蒙嘅腎上腺，透過活化荷爾蒙令你嘅血液循環改善，並將身體轉化為一個容易燃燒脂肪嘅體質。

第三，伸懶腰會運用到你全身嘅肌肉，令佢地變得有彈性。其中動作對於腹部肌肉嘅鍛鍊，以及腰部曲線嘅塑造，都係能夠為你帶嚟體態美咖！

動作1: 好似貓咁樣四肢著地，兩腳之間留兩個拳頭嘅距離，手指、腳趾各自併攏。視線向下，吸氣嘅同時腹部凹陷、背部拱起（貓威嚇時嘅姿勢），停止呼吸，維持姿勢9秒鐘。

動作2: 跟住就一邊喊「喵～」邊吐氣，臀部向上頂，雙手向前伸，停止呼吸，維持姿勢9秒鐘。

每晚重複動作1和動作2一共10次就可以啦。日本女星岡本麻里親自做咗一個月貓式伸懶腰，結果佢輕咗差唔多 4 公斤，腰圍更加係減咗10cm。腰嘅線條變得明顯，可以話係大成功呀！