H&M 與世界自然基金會(WWF)攜手推出咗一套全新童裝系列，特別以可持續物料製作，希望啟發世界各地人士保護地球。全新系列將於2018年9月27日喺全球50多個市場推出，每件售出嘅產品將有10%銷售額撥捐世界自然基金會嘅環保工作。  

環顧全球，唔少野生動物物種現正面臨失去棲身之所、水源污染及氣候變化嘅威脅。全新童裝系列以野生動物為設計靈感，印有老虎、雪豹、北極熊、鯨魚、大象、企鵝等圖案，以突顯呢啲動物係如何危在旦夕。

H&M集團可持續發展主管Anna Gedda表示獨一無二嘅地球，實在彌足珍貴。為咗保護地球環境，留俾未來世代，大家必須團結一致，群策群力。

佢亦指出集團堅信可以為時裝行業開創可持續發展嘅未來，以可持續方式製作及穿著時裝。佢地會致力實現全面循環生產嘅抱負，因此已訂下目標，由2030年開始只會採用再生或其他可持續來源嘅物料。

世界自然基金會企業市務合作主管David Bloch表示好高興可以與H&M再度攜手，推出另一全新服裝系列，延續佢地同H&M矢志革新嘅長期合作，不但能為世界自然基金會嘅環保工作籌集善款，仲可以啟發下一代兒童捍衛環保。呢套系列亦證明即使進行大規模生產，都可以為環境及兒童帶來更多裨益。

今次推出嘅全新系列，專為嬰兒及14歲以下嘅兒童設計，包括舒適休閒嘅運動衫、柔軟貼身褲，以及活潑可愛嘅連帽裙，而顏色就由淺粉色、中性色，以至黑色及灰色均有，並以有機棉為主要製作物料。