每到秋季，日本嘅楓樹亦由北至南相繼轉紅，為各地山胍及名勝景點帶嚟另一番姿色。紅葉之美，白天觀賞固然精彩，喺夜間燈光照射下嘅楓葉更係增添咗一份神秘嘅美態。位於京都東山嘅淨土宗寺院知恩院將於11月2日至12月2日舉行為期一個月嘅特別夜間亮燈活動，等參拜者喺觀賞夜楓時亦都可以一睹夜間知恩院嘅庭園美景。
此外喺夜間特別參拜期間，今年知恩院更以「Hand to Hand」為主題舉辦慶典，邀請日本僧侶樂隊及淨土宗劇團等團體於三門及寶佛殿進行限定表演，弘傳淨土元祖「圓光大師」嘅念佛教義。
昭和名園友禪苑內體驗夜楓風情 品味京都古庭的清新淡雅
知恩院喺每年嘅春天及秋天都會舉行結合亮燈活動的夜間特別參拜，等訪客邊漫步邊觀賞楓葉及夜間點燈嘅美景。柔和燈光點亮紅葉，亦照亮咗昭和時代嘅名園友禪苑。慈祥嘅聖觀音菩薩像佇立於庭園中央，喺燈光嘅映襯下宛如羊脂白玉，更添雅致。
閃爍嘅池面與隨風搖曳嘅夜楓互相輝映，令人走每一步都可以感受到池泉式庭園和枯山水所蘊含嘅禪意。池畔楓意，實在叫人陶醉。友禪苑旁亦有一條被稱為女坂嘅斜坡，遊客不妨沿著女坂漫步細賞兩旁嘅夜楓美態，留下難忘回憶。
國寶級建築「三門」融合夜間亮燈表演 盡顯四百年雄偉的歷史氣魄
知恩院嘅三門於1621年奉德川家康嘅第三子德川秀忠之命所興建，並於2002年被指定為國寶級建築物。三門高24米，寬50米，係日本現時最大嘅木造二重門，所以每年亦有唔少遊客特意前嚟一睹其歷史風采。
時隔兩年，今年知恩院決定再次喺夜間點燈活動期間，喺LED燈嘅照射以及夜楓嘅襯托下將三門嘅神秘及莊嚴呈現於人前。氣勢之大，不禁令人為之震懾。此外，知恩院為咗讓大眾接觸同認識淨土元祖「圓光大師」的念佛教義，今年更以「Hand to Hand」為主題舉辦慶典，仲邀請咗日本僧侶樂隊同埋淨土宗劇團分別以音樂及舞台表演等現代表演藝術方式於三門下及寶佛殿與眾同樂，以活潑嘅禪心弘揚佛法。
知恩院秋季夜間亮燈活動
地址：
淨土宗總本山知恩院
〒605-8686 京都市東山區林下町400
開放時間：
2018年11月2日(五)〜12月2日(日)
友禪苑・三門樓上・女坂・寶佛殿
17:30 - 21:30（關門前30分鐘停止入場）
交通方式：
<地下鐵>
・地下鐵東西線「東山站」下車後徒步約8分鐘
・京阪電鐵「祇園四條站」下車後徒歩約10分鐘
・阪急電鐵「河原町站」下車後徒歩約15分鐘
<市巴士>
「知恩院前」下車後徒歩約5分鐘
京都站出發乘搭206號線
三條京阪出發乘搭12號線
四條河原町出發乘搭 31・46・201・203號線
入場費：
大人：800日圓 (含稅)
小學生及中學生：400日圓 (含稅)
官方網頁：http://www.chion-in.or.jp/special/lightup_aut/
