由2012年起，領展推出「Link the Bike 領展單車推廣活動」，提供單車借用服務，希望喺社區推動綠色生活及運動文化。隨住活動完滿結束，同時秉承「連繫好生活」嘅品牌承諾，領展日前捐贈咗合共85輛單車俾學校、復康機構及單車團體，等有需要人士可以使用。領展並邀得前香港單車隊選手何兆麟擔任此活動大使，提供專業意見，更參與單車捐贈聯繫及有關宣傳工作。

受惠今次單車捐贈嘅機構包括：愛秩序灣官立小學、匡智屯門晨崗學校及展騰單車會。領展企業事務及市場策劃總監何柳鳳表示佢地希望透過呢次捐贈活動，賦予單車二次生命，除咗貫徹環保概念外，呢批單車仲可以重投社區，服務有需要嘅學校及團體，傳承單車運動文化。

三間受惠機構均對領展嘅捐贈深表謝意，並表示會善用獲贈的單車舉辦教育或義工服務。匡智屯門晨崗學校石偉強校長指出學校注重培養學生多元發展，因此計劃將呢批單車用嚟舉辦唔同嘅活動，培養學生對運動嘅興趣及訓練他們嘅合群性。

另外，愛秩序灣官立小學崔家祥校長希望藉此舉行探索社區嘅活動，讓學生以騎單車嘅方式發掘城市面貌及文化。展騰單車會就期望利用獲贈嘅單車進行義工服務，令弱勢社群如長者及視障人士走出居所，喺外面享受踏單車嘅樂趣。

除咗提供單車及單車工具借用服務，「Link the Bike領展單車推廣活動」過去亦舉辦過一系列與社區息息相關嘅活動，致力增強市民與地區嘅連繫。其中「美食單車遊」由單車領隊帶領本地社群探索文化與歷史寶藏，並欣賞沿路嘅自然風光及享用地道美食。

而「單車行大運」則就俾參加者喺新春期間到香港唔同角落騎著單車，感受農曆新年嘅熱鬧氣氛。另外，領展多年來積極參與由香港旅遊發展局舉辦嘅新春賀歲活動，並以「單車舞火龍」表演向市民及旅客送上真摰祝福。