大家有無幻想過,遊樂場、動物園呢兩個極具人氣嘅景點能夠合為一體呢?位於日本東京近郊嘅東武動物公園就完美地結合兩者,打造出大小老幼都無法抗拒嘅主題公園。園內不但可以觀賞到多種動物、享受刺激嘅遊樂設施,更能欣賞繁花盛放嘅驚豔景色!
東武動物公園內共有多達120種、1200隻動物,而必定要去睇嘅就當然係作為招牌嘅稀有白虎啦。因為有着雪白外型,白虎被認定為神嘅化身,所以白虎觀賞區域設有白虎神社,俾訪客祈求好運。
想見到白虎活潑一面嘅話,就一定要參加WHITE TIGER GUIDE啦!飼養員逢星期六、日、假期嘅14:40~14:50都會喺「CAT WORLD」進行餵食活動,平日懶洋洋嘅白虎會變得超級活躍,絕對係近距離觀察肉球嘅好時機!
公園內嘅遊樂園中約有30種遊樂設施,不但有驚險刺激嘅「新滑空水上過山車」、「水上木製過山車」等等,適合喜愛追求速度嘅遊客!另外,場內亦有老少咸宜嘅休閒設施,想欣賞園內景緻就一定要乘搭摩天輪啦。
喜愛賞花的話,就一定要到訪園內嘅Heartful Garden。內裏種有多達410種植物,包括玫瑰、桃花、櫻花等等。四季期間都有植物處於花季,不論何時造訪都能夠流連於花海中!
東武動物公園
地址:埼玉県南埼玉郡宮代町須賀110
營業時間:09:30〜17:30 (有可能因季節、活動及天氣而有所改變)
TEL:+81-3-4405-5370
前往方式: 東武晴空塔線「東武動物公園」站下車徒步10分鐘、巴士由東北自動車道「久喜I.C」約20分鐘 / 東北自動車道「岩槻I.C」約25分鐘 / 圏央道「白岡菖蒲I.C」約20分鐘 / 圏央道幸手IC約20分鐘