今次我地想同大家行條BB班路線,過年食肥咗都唔怕行唔郁。
首先係荃灣川龍街搭80號小巴至總站,落車後向車尾方向走,靠右過橋,經過橫龍嘅村屋之後再向前會見到食水缸,行前少少見到分岔路,揀右邊車路行,跟住「引水道及老圍」方向走,之後轉入林中小徑。
沿小徑一路行,會見到涼亭同一塊大石碑,可能年代太久遠已經睇唔到上面刻咗乜野字,大家可以係度休息一下。
再向前行會經過電塔,大家可以係度影下風格圖,再向前行,好快就見到大帽山郊遊地點一號場,呢度有個涼亭同觀景台,行呢條路線嘅好處就係明明你係咁行平路同落山但景觀都係好開揚,放假想郊遊抖下氣又真係唔一定要係咁上樓梯上斜坡挑戰自己嘅。
width="100%" height=""
離開大帽山郊遊地點一號場,就開始落樓梯,沿途一路落旁邊都有幾個影相位,小編呢啲膽細細都可以爬上影相,個人覺得係大石上面景觀比係上面觀景台靚。不過都係果句,量力而行、注意安全。
一路係咁落係咁落樓梯就會到達引水道 (即緩跑徑)。係度你向左右走都冇所謂,我地就一路向右行,會見到有一排紅色嘅樹,其實係度嘅景觀都唔錯,跟住見到樓梯就可以落去,基本上條條路最後都可以去到荃錦公路,落到去可以搭小巴或巴士出返地鐵站或者沿路一直行直到見到天橋就去到愉景新城啦。
難易度:⭐
基本上只有平路同落山,短程中嘅BB班。
打卡度:⭐⭐⭐
以唔洗上坡黎計,都睇到幾多野,景色都好開揚。
設施完善度:⭐⭐
只有川龍有茶樓可以食野,所以建議自備食物!
其實有時想親親大自然真係唔洗怕攰,有時去行下啲簡易路線,大家放假輕鬆一下都唔錯啊!今次嘅郊遊習作係咁多,我地下次見啦!拜拜!
Tags: Homita遊香港
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like
| by Y小編 | 7 years ago
郊 Landscape | by Y小編 | 4 years ago
郊 Landscape | by Y小編 | 5 years ago
郊 Landscape | by Y小編 | 5 years ago
郊 Landscape | by Y小編 | 5 years ago