夏日天氣酷熱，餐枱一定要放返啲好野食先可以揾返胃口。今日就去到位於觀塘APM嘅神山麺屋，品嚐各式小食同埋大廚精心設計嘅夏季限定沾麵啦！

神山麺屋係一間嚟自東京神田嘅人氣拉麵店，食店以富士山藝術風格融入沾麵文化，可以話係開創咗香港拉麵歷史嘅先河。開業至今，其主打嘅神山沾汁麵依然話題不斷 。 

 「神‧海老沾汁麵」 $128
呢款顏色鮮艷嘅沾汁麵係神山麺屋大廚特意設計嘅夏季限定嚟咖，當中用咗「黄金 の七福神」同「海老(蝦)」做設計題材。 

「黄金の七福神」位於「富士五湖」之一嘅河口湖北岸湖畔，負責守護當地人民。而七福神中嘅「寿老人」，面上留著長長白鬚，象徵長壽及吉利。初夏日出時分，從「寿老人神社」門外，仲可以見到富士山被陽光染紅嘅「赤富士」景象，與其吉祥之兆更顯得相得益彰。 

日本料理中嘅「海老(蝦)」，因其長長嘅觸鬚、 彎曲嘅身體，好似喺海中生活嘅長壽老人，仿佛好像「寿老人」一樣。而特調嘅赤紅蝦湯沾汁，顏色亦好比赤富士般吸引。

「神‧海老沾汁麵」重現由寿老人神社遠眺「赤富士」嘅神山景象。大廚特意選用原隻大海老入饌，肉質鮮嫩，蝦肉較為彈牙。 為咗突出海老鮮味，大廚先將蒜蓉、辣醬及多種香料炒香，再加入海老一同炒製，濃郁嘅醬料均勻滲入海老當中，最後再煎至外殼香脆，色香味俱全。 

沾汁選材方面亦不馬虎，湯頭依然選用混合日本魚介及秘製醬油慢火熬製超過 12 小時嘅秘製豚骨湯，加入神山秘製赤紅蝦湯，蝦肉搭配沾汁時味道更濃郁鮮甜。 因為神山採用嘅係坑紋麵條，所以沾汁可以緊緊地掛喺麵條上，做到完美嘅掛汁效果。

和風蘋果沙律 $45
沙律中加入蟹籽，青瓜，富士蘋果，火腿，提子乾，脆片同埋乾果，帶嚟多種口感。因為配搭嘅係芥末沙律醬，食嘅時候會散發出淡淡嘅辣味，唔會好似平日食嘅沙律咁平平無奇。一條條爽脆嘅富士蘋果就為成個沙律帶嚟清新嘅感覺。

雙色牛舌 $45
呢款小食之所以被稱為雙色，係因為牛舌用作兩食，一熱一凍。牛舌特別選用中間最軟淋嘅部份，熱食就係先將牛舌煎香，再喺上面加上濃厚嘅秘製燒汁同灑上紅黃椒，令牛舌更加火熱惹味。而凍食嘅口味較為清淡，食店以低温烹煮牛舌，再喺上面加上蔬菜汁。夏天食就啱哂啦！

菠蘿特飲 $15
夏天又點少得菠蘿特飲？呢款飲品以菠蘿汁加上梳打水製成，仲可以見到一塊塊菠蘿粒。酸酸甜甜嘅味道將夏日風情帶哂出嚟，既好飲又解渴。