女士們愛美可以話係刻係骨子裏嘅天性，除咗鑽研化妝技術之外，點樣保養皮膚亦係重要嘅課題之一。你有無試過一擲千金，買咗一大堆保養品返嚟用，但皮膚就一直未見起色呢？咁就好可能係你無視咗日常中幾個重要嘅護膚法則啦！

#幾時都要做好防曬

紫外線係肌膚老化嘅一大主因，由於佢地無處不在，所以唔理幾時，防曬措施都一定要做足。中午12點到下午2點係紫外線最強嘅時段，可以嘅話就盡量留返喺室內，保護皮膚。除咗塗抹防曬乳，你地仲可以為自己加添裝備，如陽傘、帽子、口罩，以及墨鏡等，抵擋紫外線嘅攻擊。

#堅持徹底卸妝

彩妝缷得唔乾淨嘅話，就會造成色素沉澱，而且化妝品中帶有化學成份，殘留喺皮膚上就會造成毛孔阻塞，令你容易生粉刺同青春痘。唔好以為濃妝先要卸妝呀，就算只係化淺妝亦要做到徹底落妝，否則買再多嘅保養品亦會被殘留嘅物質所阻擋，無法進入毛孔被肌膚吸收。

#養成運動習慣

都市人生活繁忙，好多時就會忽略咗運動嘅重要性。運動提高我地嘅新陳代謝效率，加快身體排出毒素同廢物嘅效率，並延緩老化。運動仲可以減少多餘嘅脂肪，令你嘅肌膚更加緊緻。身體好咗，自然連帶膚質都可以一齊提升啦！

#保持愉快心情

皮膚問題好多時都係同不穩嘅情緒，以及過大嘅精神壓力掛鉤。呢啲種種嘅原因令我地心情不快，亦因此而影響到內分泌，引致免疫功能紊亂。由於皮膚嘅免疫力大降，肌膚就容易出問題啦！所以保持好心情喺某程度上係可以預防皮膚問題咖。

#充足且高品質嘅睡眠

由晚上11點開始，身體就會進入修復期，喺呢個時間開始休息，並瞓足七個鐘嘅話，就可以令肌膚得到充份嘅休息。唔少都市人喺瞓之前都會習慣先玩一下電話，但呢個係不良習慣嚟，會影響睡眠品質。入睡前應該將手機關機，並播放輕柔音樂及睇下書，令成個人徹底放鬆沉澱，亦更加容易進入深度睡眠。